Son vaxtlar kişilər arasında geniş yayılan xəstəliklərdən biri də sonsuzluqdur.
Hər bir kişi və qadın müəyyən yaşda nəslin davam etdirilməsi üçün övlada sahib olmaq haqqında düşünür.
Əksər hallarda ailəliyin ilk aylarında hamiləlik baş verir.
Lakin bəzən ailənin övladının olmasında problemlər meydana gəlir.
Yəni, ya hər iki valideyn, ya da onlardan biri sonsuz olur ki, bu da ailənin övlad sahib olmasına imkan vermir.
Statistikaya əsasən, hər on ailədən biri bu problemlə üzləşir. Son illərdə isə xüsusən kişilər arasında sonsuzluğun artması ciddi narahatlıq doğurur.
Qeyd edək ki, sonsuz olub-olmamaları kişilərin özündən daha çox asılıdır.
Androloq-seksopataloq Orxan Ağabəyovun sözlərinə görə, bir sıra profilaktik tədbirlər görməklə sonsuzluğun qarşısını almaq mümkündür.
Bunlar aşağıdakılardır:
- sağlam həyat tərzi (8 saatlıq yuxu, yaxşı istirahət, idmanla məşğul olmaq, təmiz havada müntəzəm gəzintilər)
- ailədə və işdə mümkün qədər stressdən uzaq durmaq
- balanslaşdırılmış qidalanma (heyvan əti, yumurta, qoz-fındıq, dəniz məhsulları, təzə meyvə-tərəvəz, bal və s.)
- reproduktiv orqanların xəstəliklərinin vaxtında müalicəsi
- müntəzəm cinsi həyat (3-5 gündən bir)
- həddən artıq işləməmək, kompüter arxasında mümkün qədər az vaxt keçirmək (maksimum 4-5 saat)
Bundan başqa sonsuzluğa qarşı profilaktik tədbir kimi uzun müddət ərzində soyuqda, eləcə də yüksək temperatur şəraitində (sauna, hamam) qalmamaq, eləcə də alkoqol, siqaret, narkotik maddələrdən istifadə kimi zərərli vərdişlərdən uzaq durmaq məsləhət görülür.
